Sunday, January 27, 2019

My creative ideas process and workflow

https://www.youtube.com/watch?v=U_qIKzX4Si8
This post is to explain the way how the remains of my brain function while I am trying to make some creative work, and it shows how I try to make sense of things and analyse everything around me...The following took me around 6 months of constant work, I exported the video in 4K video format because I wanted to elevate the quality of the Arabic content online, I also made the English CC subtitles because I am a perfectionist



ليرك فيديو أو فيديو كلمات اغنية ليلة سويته من التسع الاغاني اللي سويتهم و نزلوا على قناة لطيفة الرسمية على يوتيوب من سنة في مثل هذا اليوم 27 يناير من سنة 2018 ، و في بوست مستقبلي راح اكتب عن تصميمي للوقو لاتيسول اللي يطلع في بداية الفيديوات

الاغنية كلماتها وايد #رومانطيقية و يت في بالي هالفكرة بس صور لطيفة اللي عندي ما كانوا لايقين عالفكرة، و لما وصلوني هالصور كملت الفكرة اللي في بالي، و عشان اسم الاغنية ليلة فكان بديهي بالنسبة لي أن الفيديو كله يكون في ليلة من المغرب للفير و لأن كمية الحب اللي فيها اخذتني على ليلة صيفية ساحرة - مو في صيف الكويت طبعا - و في مقاطع الموسيقى #چراقيات عشان #حب و #صندوق_طماط و #الخ ...و كانوا #الچراقيات - هاش تاق ثاني قصدي وسم ثاني عشان الألف و اللام - يطلعون اخر شي وقت الفير بعد، بس بعدين قررت اشيلهم عشان ما أزعج الجيران اللي نايمين و حطيت بدالهم شهب... كنت #ارندر الفيديو و اروح الدوام و ارجع و لي الحين مو خالص #ترندر مع اني كنت استخدم #كمبيوتر قصدي #حاسوب #قيمنق لأن فيه وايد #افكتس و #انالايزر أو الحركة اللي دار مدار - هههههههههه اول مره اشوفها مكتوبة - الشمس و القمر و حركة اللمبات مع الايقاع

ادري ان النقلة من الصبح لي الليل مو طبيعية و انا احب اسوي شي اقرب للواقع بس في الفيديو كنت ابي اسوي كل شي يصير بسرعة عشان كلام الاغنية يمشي على حركة الصورة و كنت ابي اجاري الايقاع



فيديو كلمات أغنية كل اللي حبوا سويته من البوم لطيفة و نزل على قناتها على يوتيوب الرسمية من سنة

كلمات الأغنية تقول فيها قصص ناس و بعدين تقول إن كل قصصنا كلنا مثل بعض بالاخير، فخليت اللون اخضر مو عشان لوني المفضل بس لأنه لون الحياة و الكلمات عن الحياة و لأن الاخضر لون محايد و حسب علمي ماله علاقة بالحالة العاطفية مثل الاحمر و الحب، اللون الابيض ما ينفع لان ما راح يبين تداخل الالوان مع الظل و الكلمات اللي يصيرون مع كل حركة...خليت لطيفة كأنها قاعدة تشوف ظل الناس يمثلون القصص اللي قاعدة تقولهم و كأنها الراوي و في مقطع يطلع ظلها معاهم لأنها قاعدة تقول ان كل قصص الناس بالاخير مثل بعض و ان اهي منهم

في مقطع من الفيديو قصة قصيرة من قصصي قررت احطها، و كنت مو قادر اتوازن عاطفيا و أنا اشتغل في هالمقطع اكثر من مرة، بس هذا اللي قدرت عليه بالاخير 🙈


فريش كان اول فيديو كلمات سويته من الالبوم بس مقارنة في اللي سويتهم بعده انا مو راضي عنه لان كان في اختلاف بيني انا كمصمم و البراند منجر "Brand Manager" و طبعا مافي وقت عشان امخمخ "Brain storming" و امزج عشان يطلع شي مثل ما انا ابي، و كان ثاني ليرك فيديو اشتغلت فيه لأغنية ملحوقة لان كلمات الاغنية دخلت راسي من اول مره سمعتها لي درجة اني قلت حق لطيفة:
"لو كُنت وَطن لَكانت هالأغنية نشيدي الوطني"

فكرة الاغنية انها سعيدة و حزينة بنفس الوقت فسويت سلايد شو من صورتين و كنت احاول اني التزم بقواعد البراند منجمنت "Brand Management" اللي المفروض التزم فيها و اللي كانت تحد من اطلاق العنان لقدراتي و اللي ساعات ما تكون لايقة على الاغنية و ما كنت مقتنع بالنتيجة خصوصا اني احب اسوي الشي صح او ما اسويه من الاساس، كان وايد شغل بسيط في الـ موشن غرافيكس "Motion Graphics" و انا ابي اسوي شي اكبر من فيديو كلمات عادي لان مثل ما قلت في بوست قديم:

"فأنا أعشق أن أدفع و أتحدى نفسيَ
لأرى ما استطيع فعله و ما تستطيع هيَ"

كنت ابي اوصل الاحساس اللي وصلني من الاغنية في التصميم...و بالاخر قدرت اسوي اللي ابيه و ضفت تفاصيل اكثر على اللي سويته من قبل و طبقت هالشي على باقي الاغاني اللي اشتغلت فيهم بعدين...سميت هالشي ايموشن غرافيكس "Emotion Graphics" و ضفت معنى الكلمة في قاموس بشار الوجيز الموجود بس في راسي

الاغنية فيها جزئين تبدا بموسيقى ناعمة و بطيئة و بعدين يقلب الايقاع هاوس "House" ، فبعد التعديل خليت الالوان اغمج بالبداية و لما تقلب الموسيقى دخلت الاضاءة فيها و بالنهاية لما تقول: "لا لا" ضفت كونفيتي عشان ما يصير ممل و هم "لا لا" حسستني انها خلاص قررت انها تعيش حياتها و مو مهتمة حق شي لي درجة انها ما قامت حتى تغني و قامت تقول: "لا لا" ...الشي الوحيد اللي لطيفة طلبته اني اضيف الصورة اللي تطلع لما تقول: "و اضحك انا عالذكريات" ، و كانت اضافة بمحلها

و قررت بعد اسوي فيديو كليب لِپْ سِنك بمناسبة مرور عشرة سنوات على لقائي الاول في لطيفة




كنت ارجع من الدوام كل يوم عالثلاث اخلص اشياء بسرعة و اقعد اشتغل على الفيديوهات، انا لما يحوشني الإلهام شاهين مخي ما يطفي و ما اقدر انام، و بالفترة الاخيرة قمت اكتب و ارسم كل شي يمر في بالي بنفس الوقت على غوغل كييب "Google Keep" لاني ما اقدر احفظ بسرعة و لانه يسهل تنظيم افكاري...و هذا اللي اقصده في بوست لي من قبل لما كتبت..

"فأصبحت أبسط للحياة نظرتِيَ 
لأُطْلِق اليوم للعامةِ في حسابيَ 
خواطر فكري و عَواصِفه الذِّهنية 
التي تَثورُ و تنطفئ كألعابٍ نارية 
قررت أن أحفظها و أرسمها بكتابيَ 
لأُشارِكَكَمْ جَمالَ ذاك المشوه عقليَ"

كلمات أغنية اخونه لا اخذتني على قوة و عزة نفس و نار و غضب، فقررت احط الشمس كخلفية بس كانت أول شي تخرع و كانت نارها وايد واقعية كأنك واقف يمها، بالضبط نفس شمس الكويت

في بداية الاغنية الموسيقى كانت شوي شوي في تصاعد و كانت الفترة طويلة، فكانت حركة الغيم اول شي اللي حاولت اخليها متناغمة مع الموسيقى

اخترت هالخط لان ايقاع الاغنية مقسوم - بس بغيتيارات روك مو طبلة - و بالنص في مقطع موسيقى عشان ما يصير ممل حطيت الحمامتين يطيرون مع بعض و بعدين يفترقون و تصير بروحها و اخر شي خسوف القمر على أساس هم و انزاح و الحمامة تكمل طيارنها يعني أنها حرة و چان انا اكسر اوله عشان ما يرجعون حق بعض بعد

هذا الفيديو اللي اشتغلت فيه اكثر على ان الكلمات تطلع بأحجام غير بعض و تتحرك غير بعض مقارنة بالاثنعش من الثلتعش اللي سويتهم و مثل ما قلت قبل نزل منهم تسعة



بحر الغرام طولت على ما يتلي فكرتها يمكن لاني ما احب اسمع اغاني من هالستايل، بس لما يتلي الفكرة و قلت حق لطيفة عنها قالت لأ...بس انا الفكرة في بالي كنت اشوفها بخيالي قبل لا اسويها و كملت و سويتها بالاخر، لطيفة كانت معطتني حرية كبيرة في الشغل...ما كانت تتعنفق مثل ما يقولون لوول

الفكرة انها غرقانة في بحر الغرام و بنفس الوقت فرحانة بغرقها ، هذا اللي وصلني من كلام االغنية...و الصور هذول كانوا من اخر جلسة تصوير وصلني و كانوا لايقين وايد على الفكرة

ترندر "Rendering" البحر كان مفجر الكمبيوتر، عشان احل هالمشكلة قررت اني اسوي مقاطع صغيرة و اكررها عشان اقدر اشتغل...مقطع البحر من فوق اللي يطلع بالبداية و مقطع تحطت الماي و مقطع قاع البحر اللي يطلع في التتر


طبعك عنيد اغنية تونسية ، فحبيت احط ارابيسك "Arabesque" في التصميم - اخذته من موقع صور ستوك مشترك فيه بس غيرت الالوان عشان ابي الوان حية اكثر- و بنفس الوقت استخدمت الارابيسك كإيكوالايز ، استخدمت الصور اللي بالازرق مع انهم قدم و مو من سشن الالبوم بس لانهم مناسبين و بعدين ضفت اللي بالاصفر عشان لطيفة طلبت هالشي و طلبت من لطيفة صورة المبخرعشان اضيفه و صورت لي اللي عندها في البيت و ضفته :)

الخط اللي استخدمته مغربي لان هذا الجو اللي كنت ابي اوصله بالفيديو، بعد ما ضفت الليت اللي يطفي لما تقول بالاغنية: "مطفي الضو" و لطيفة بعد ما شافته ضحكت على الحركة...في اخر مقطع حطيت النجمة الثمانية عشان شوية اغير و حتى لما تطلع من الشاشة اخر شي من مكان غير متوقع

لو الحين بغير شي بالفيديو راح اغير الفل اللي فوق بالبداية

السؤال الحين، جم شخص يحب يشوف الفيديوات اللي سويتهم و ما نزلوا؟

No comments: