Wednesday, March 28, 2012

قصة ظهوري مع لطيفة في برنامج آخر من يعلم

هالقصة صارت سنة 2010 و من وقتها كانت مسودة (draft) و ما كملتها إلى توه...و هي قصة ظهوري مع لطيفة في برنامج آخر من يعلم إللي كانت تقدمه الفنانة أروى على قناة أم بي سي (MBC) و القصة صارت في مثل هاليوم من سنتين...

في البداية حضرت البرنامج على أساس إني راح أظهر شوية كضيف في الحلقة و يوم تسجيل المقابلة كل شي كان المفروض يصير...صار غلط!

وقتها ما قلت حق أحد من ربعي عن الموضوع، وصلت بيروت يوم 28 مارس 2010 لتسجيل الحلقة و كانت أول مرة أروح فيها بيروت، كنت ماخذ معاي دشداشة و غترة على أبو إني بلبس شي رسمي في البرنامج، أول ما وصلت الفندق بلغوني إن في مسج لي و هو إني باجر على الساعة 4 العصر أكون جاهز عشان السايق راح ايي.

يوم 29 كان التسجيل، طلعت الصبح سويت جولة و رجعت عالساعة 2 و نص و دخلت آخذ شور، رن التلفون و قالولي إن السواق وصل (كان الساعة 3 يعني كان ياي مبجر) و رجعت كملت و أنا قاعد أسبح جان أتذكر إني ناسي أييب عقالي لووول

قلت الحين من وين أييب عقال في لبنان؟ و ما يبت معاي قميص أو شي رسمي ألبسه و ما في وقت إني أروح أشتري شي، جان ألبس اللي طلعت فيه بالبرنامج...أدري الجاكيت ماله شغل بس كان برد، و للعلم بس يقولون إن الكاميرة تزيد وزن الشخص، صح إنها تزيد بس انا وقتها هم كان وزني زايد من بعد العملية :(

المهم، رحت البرنامج و صار كلام عن الحلفاء إن في ناس كانوا مرشحين و ما قدروا يحضرون و بجذيه تحولت أنا إلى حليف بالبرنامج، في أحداث صارت و في أغنيات غنتها لطيفة ما عرضوها...

و احنا في الكواليس، قالوا لنا دخلوا دخلة النجوم، فإلتفت على المخرجة نهلة الفهد و الصحافي محسن محمود و قلتلهم شوفوني الحين راح اعيد تمثيل بداية كليب ما تروحش بعيد، و كنت متوقع إن كل الناس بتتكلم عن تحيتي حق الجماهير الغفيرة و هذا اللي صار و الى اليوم قاعد يصير لوووول

طبعاً انا كنت مو على بعضي مثل ما يقولون حاس برهبة المسرح و الاستوديو كان برد و قطيت نفسي قط أول ما قالوا اسمي نفس لما الماي يكون بارد و تطبون فيه بسرعه...

المهم صورت وايد فيديو HD قبل لا اروح و خلال البرنامج و بعده بس كله راح لما ضرب الهاردسك مالي، و كان اخر شي قدرت اسحبه من الهاردسك الصور اللي صورتهم بكامرتي في بيروت تشوفونهم تحت طبعاً ما عدا الصور اللي انا ظهرت فيهم يكون أحد مصورنا.

يوم 30 مارس و انا بمطار بيروت شفت شيرين مع ريلها و اهي صورت حلقتها قبل لطيفة بيوم...وصلت الكويت و كنت وقتها اجازة و رفيجي اللي يدرس بره كان بالكويت، فكنا مقزرينها بالدوانية الفير نشوف أفلام رعب تجارية هابطة لووول


 
 

يوم صار 1 أبريل قلنا حق بعض يلا خنسوي برودكاست في البلاكبيري جذبة أبريل، جان اهوه يدز برودكاست إنه بيعرس و كل من رد عليه بالمبارك إلخ إلخ...و انا دزيت برودكاست "ترقبوا إطلالتي مع لطيفة في برنامج آخر من يعلم"، طبعاً محد رد لأنهم خافوا يقولون إي جذبة أبريل و بنفس الوقت قالوا يمكن صج فسكتوا و يطلعون اهمه المهابيل بكل الحالات لووووول

بثوا الحلقة شهر 5، ثاني يوم رحت الدوام و إلا كل البنات يقولونلي...بشار؟!!! ليش ما قلتلنا بتطلع في برنامج آخر من يعلم؟!!! و بالليل ابوي قالي ان واحد من السعودية تعرفنا عليه خلال فترة العلاج في المانيا دق عليه يقوله انه شافني بالبرنامج...جان اكتشف ان البرنامج العالم كله يتابعونه!

الغريب ان لي الحين ما يالي ولا عرض من شركات الانتاج مادري ليش!؟

عقبها بفترة قصيرة، جريدة الأنباء الكويتية نشرت صورتنا في لعبة إكتشف الأخطاء لوووول



No comments: