Saturday, February 13, 2010

دلاق ميري!

صارلي فترة ما دونت مو عشان ما عندي شي اقوله لأ...عشان لي خلق أسوي شي...


قررت أن أكون من عامة الشعب بشراء البلاك بيري!

كنت و ما زلت أكره البلاك بيري لأنه هبه من هبات الكويتيين، بالضبط بالضبط نفس لزقات ماروكو و تويتي قبل جم سنة اللي كانوا يلزقونهم على السيارات...

الموضوع هذا ذكرني في تلفونات نوكيا أول ما ظهروا عندنا، كان أول تلفون يدعم اللغة العربية و ما كان في يونيكود عربي للموبايلات مثل الحين، و كانت تلفونات نوكيا الأكثر إنتشار مو عشان نوكيا هي أفضل شركة تنتج الهواتف النقالة...لأ، عشان التعريب بس.

شنو الشي اللي مسوي هالخبه كلها على البلاك بيري مع ان صارله مليون سنة نازل و مع أن الآيفون أحسن منه 982376 مره؟


في حالة البلاك بيري، برنامج خاص بالبلاك بيري اسمه (بلاك بيري مسنجر) و يسمونه إختصاراً بي بي أم....و هالبرنامج عبارة عن قرقر واجد ماله داعي و تعاميم إدارية بين الربع و نكت و مادري شنو كله مقابل إشتراك شهري بخدمة داتا 14 دينار كويتي...بمعنى ثاني دز مسجات في البلاك بيري مسنجر كثر ما تبي حتى لو حق تلفونات بلاك بيري دولية.


الحين قاعدين تفكرون ليش أنا إتخذت القرار المصيري بإني أترك التميز إللي أنا فيه كوني مو من مؤيدي البلاك بيري و أكون من عامة الشعب بشراءه؟


السبب لأني في الفترة الأخيرة لما أطلع مع ربعي كلهم قرقه في بلاك بيريهاتهم إلا أنا قاعد بينهم جني خيال مآته (للعرب خيال مآته هو الفزاعة اللي تنحط في المزارع)...فقررت أركب الموجة هذي و آخذ واحد مع إني مو مقتنع فيه و لا راح أقتنع فيه.

4 comments:

Mohammed said...

مبروووووك صرت ماك جيكن لوووول

شوف اهو حلو وتقزيره لكن مرات يكون قثيث

بس يقزر الوقت عليك بالدوام

وعليك بالعافيه

SHOOSH said...

ترى والله حلو

ضالمين هالجهاز الفقير

مالك شغل بالي هبوا فيه عشان الترزز و المغازل

الجهاز فريندلي و حلو

RADIANT GUY said...

Mohammed> لا بعد يبيلي سياره المانيه و اصير ماك جكن.
والله ما يسكت التلفون مادري شسوي فيه ساعات ودي اطقه بالطوف

SHOOSH> ممكن يونس بس لو بتاخذين خطوتين لي ورا و بتشوفين الموضوع بنظره اشمل ترا ما راح تكونين مستفيده منه بشي غير الهذره الزايده اللي تضيع الوقت و حتى البراوزر اللي فيه ما يتقارن في اوبرا اللي على الايفون

why me said...

وايد حلو الجهاز